பிறமொழிச் சொற்களைக் களைதல்

பயிற்சி


  • காலேஜ் தொடங்க இன்னும் பத்து தினங்களே உள்ளன.
  • கல்லூரி தொடங்க இன்னும் பத்து நாள்களே உள்ளன.

  • அப்ளிகேசன் போடும்போடு தெளிவான விலாசம் எழுத வேண்டும்.
  • விண்ணப்பிக்கும்போது தெளிவான முகவரியை எழுத வேண்டும்.

  • எனது நண்பர் ஸ்கூல் ஃபர்ஸ்ட் ஸ்டூடண்ட்.
  • என் நண்பர் பள்ளியிலேயே முதல் மாணவராக வந்தார்.

  • பந்துமித்திரர் சகிதம் வந்து மணமக்களை ஆசீர்வதிக்கக் கோருகிறோம்.
  • சுற்றமும் நட்பும் சூழவந்து மணமக்களை வாழ்த்த வேண்டு கிறோம்.


  • மெட்ராஸ் சிட்டியில் எங்குப் பார்த்தாலும் பஜார்கள் காணப்படுகின்றன.
  • சென்னைப் பெருநகரில் எங்குப் பார்த்தாலும் கடை கண்ணிகள் காணப்படுகின்றன.


  • அந்த வீட்டிற்கு ரெண்ட் எவ்வளவு? எத்தனை ரூம்கள் உள்ளன?.
  • அந்த வீட்டிற்குக் குடிக்கூலி எவ்வளவு? எத்தனை அறைகள் உள்ளன?


  • பஸ் ஏறி ஆஸ்பத்திரிக்குச் சென்று அவுட்பேஷண்ட் வார்டில் நின்று டாக்டரைப் பார்த்து வா.
  • பேருந்தில் ஏறி மருத்துவமனைக்குச் சென்று புறநோயாளிப் பிரிவில் நின்று மருத்துவரைப் பார்க்கலாம்.


  • இன்று எங்கள் வீட்டில் சகலரும் சந்தோஷமாய் சம்பாஷித்துக் கொண்டனர்.
  • இன்று எங்கள் வீட்டில் அனைவரும் மகிழ்ச்சியுடன் உரையாடிக் கொண்டிருந்தனர்.


  • கஷ்டப்பட்டு உழைத்தால் ஜெயம்.
  • நிச்சயம் கடுமையாக உழைத்தால் வெற்றி உறுதி.

  • வேலை பர்மனெண்ட் ஆக வேண்டுமானால் இரண்டு வருஷம் கம்ப்ளீட் ஆகவேண்டும்.
  • பணி நிலைபேறுக்கு இரண்டு ஆண்டுகள் முழுமை பெற வேண்டும்.

  • அனைவரும் நமஸ்காரம் செய்து அனுகிரகம் பெற்றனர்.
  • அனைவரும் வணக்கம் செய்து அருள் பெற்றனர்.

  • எங்கள் வீட்டுக் கிருகப் பிரவேசத்திற்கு எல்லோரும் வந்தி ருந்தனர்.
  • எங்கள் புதுமனைப் புகுவிழாவிற்கு எல்லோரும் வந்திருந்தனர்.

  • ஆஸ்தியில் பங்கு கேட்டுச் சகோதரர்கள் பெற்றோரிடம் சண்டை போட்டனர்.
  • சொத்தில் பங்கு கேட்டு உடன்பிறந்தோர்கள் பெற்றோரிடம் சண்டை போட்டனர்.

  • என் தோழியின் விவாகப் பத்திரிகை இன்றுதான் கிடைத்தது.
  • என் தோழியின் திருமண அழைப்பிதழ் இன்றுதான் கிடைத்தது.

  • என்னுடைய சின்சியர் ஒப்பினியன் என்னவென்றால் நீ படிப்பில் அதிக கவனம் செலுத்த வேண்டும்.
  • எனது மனமார்ந்த கருத்து என்னவென்றால் நீ படிப்பில் அதிக கவனம் செலுத்த வேண்டும்.

  • உனக்கு பிரீவியஸ் எக்ஸ்பீரியன்ஸ் இருக்கிறதா?
  • உனக்கு முன்அனுபவம் இருக்கிறதா?

  • தேவையான வஸ்துகள் இந்த பஜாரில் கிடைக்கும்.
  • தேவையான பொருள்கள் இந்தக் கடைக்கண்ணிகளில் கிடைக்கும்.

  • வஸ்திரம் வாங்கி வந்தான்.
  • துணிமணி வாங்கி வந்தான்.

  • சினிமாவுக்குப் போகும்போது ஸ்கூட்டரில் சென்றான்.
  • திரைப்படத்திற்குப் போகும்போது மிதியா வண்டியில் சென்றான்.

  • தாசில்தார் ஆபீஸீல் போய் ரேஷன் கார்டு வாங்கி வா.
  • வருவாய் அலுவலர் அலுவலகம்போய் குடிமைப்பொருள் அட்டை வாங்கி வா.

  • சிட்பண்ட் நடத்திப் பலர் ஜனங்களை ஏமாற்றுகின்றனர்.
  • நிதிநிறுவனம் நடத்திப் பலர் பொதுமக்களை ஏமாற்றுகின்றனர்.

  • வேலைக்கு ஆர்டர் வந்துவிட்டது. இன்றே ஜாயின் ஆக வேண்டும்.
  • பணி ஆணை வந்துவிட்டது. இன்றே பணியில் சேரவேண்டும்.

  • தமிழகத்தில் லாரிகள் ஓடும்.
  • தமிழகத்தில் சரக்குந்துகள் ஓடும்.

  • இன்றைய மார்க்கெட் நிலவரம்.
  • இன்றைய சந்தை நிலவரம்.

  • ஐகோர்ட்டில் சகஜ நிலைக்கு உடனடி நடவடிக்கை.
  • உயர்நீதி மன்றத்தின் இயல்பு நிலைக்கு உடனடி நடவடிக்கை.

  • போலீஸ் கமிஷனருக்கு சுப்ரீம் கோர்ட் உத்தரவு.
  • காவல்துறை ஆணையாளருக்கு உச்சநீதி மன்றம் ஆணை.

  • கோர்ட் வளாகத்துள் ஊர்வலம், தர்ணா போன்றவற்றைத் தடை செய்ய வேண்டும்.
  • நீதிமன்ற வளாகத்துள் ஊர்வலம். மறியல் போன்றவற்றைத் தடைசெய்ய வேண்டும்.

  • நமது தொழிலை விஸ்தரிக்க உதவும்.
  • நமது தொழிலை விரிவாக்க உதவும்.

  • பரோலில் வீடு திரும்பிய இராமச்சந்திரனை மணக்க பிரமிளா என்ற பெண் முன்வந்தார்.
  • வெளியே செல்ல அனுமதியால் வீடு திரும்பிய இராமச் சந்திரனை மணக்க பிரமிளா என்ற பெண் முன்வந்தார்.

  • 52 வயது ரயில்வே ஊழியர் ரத்தம் கொடுப்பதில் 'செஞ்சுரி'.
  • 52 வயது தொடர்வண்டி ஊழியர் ரத்தம் கொடுப்பது நூறாவது முறை.

  • அந்தப் பதவி காலியாகவே இருந்தது.
  • அந்தப் பதவி வெற்றிடமாகவே இருந்தது.

  • கிராமங்களுக்கும் ரயில் டிக்கெட் முன்பதிவு வசதி.
  • கிராமங்களுக்கும் தொடர்வண்டி பயணச்சீட்டுக்கான முன் பதிவு வசதி.

  • ஜார்க்கண்டில் ஏழு கிரிமினல்கள் கைது.
  • ஜார்க்கண்டில் ஏழு குற்றவாளிகள் கைது.

  • மும்பையில் பர்னிச்சர் கண்காட்சி.
  • மும்பையில் அறைகலன் கண்காட்சி.

  • பிரச்னையை சுமுகமாக தீர்க்க பேச்சுவார்த்தை.
  • சிக்கலை இணக்கமாகத் தீர்க்கப் பேச்சுவார்த்தை.

  • மின்கட்டண பாக்கியைச் சுட்டிக்காட்டினார்.
  • மின்கட்டண நிலுவையைச் சுட்டிக்காட்டினார்.

  • மின் கட்டணத்தின் யூனிட் ரேட்டை குறைக்க வேண்டும்..
  • மின் கட்டணத்தின் அலகுக்கான கட்டணத்தைக் குறைக்க வேண்டும்.

  • நன்றாக நனையுங்கள் எண்ட் ஆஃப் - சீஸன் விற்பனையில்.
  • விற்பனைக் கால முடிவில் நன்றாக நனையுங்கள்.


All these lessons have been duly verified by Dr. M. Sheih Abdul Kadir Maricar, Assistant Professor, Department of Tamil, The New College (Autonomous), Chennai -14.