Al - Azhar University and the Development of the Arabic language | Dr. N. Sheik Dawood & Dr. S. Sadam Hussain | Tamil Research Article

Article No : NPIJT030926

தலைப்பு : அல் அஸ்ஹர் பல்கலைக்கழகமும் அரபு மொழியின் வளர்ச்சியும் ( ஒரு வரலாற்று மற்றும் நிறுவன ரீதியான ஆய்வு )

ஆய்வாளர்கள் : முனைவர். ந. சேக் தாவூத், உதவிப் பேராசிரியர், அரபு முதுகலை மற்றும் ஆய்வுத்துறை, புதுக்கல்லூரி, சென்னை – 600014 & முனைவர். ஷா. சதாம் ஹுசைன், உதவிப் பேராசிரியர், அரபு முதுகலை மற்றும் ஆய்வுத்துறை, புதுக்கல்லூரி, சென்னை – 600014

சுருக்கம் :

அரபு மொழி மனிதகுலத்தின் மகத்தான நாகரிகச் சாதனைகளில் ஒன்றாகும். இது பதினான்கு நூற்றாண்டுகளாகத் தொடர்ந்துவரும் சமய, இலக்கிய, அறிவியல் மற்றும் தத்துவப் பாரம்பரியத்தின் ஊடகமாகவும், திருக்குர்ஆனின் புனித மொழியாகவும் விளங்குகிறது. பல நூற்றாண்டுகளாக அரபு மொழியின் பாதுகாப்பு, தரப்படுத்தல் மற்றும் உலகளாவியப் பரவல் ஆகியவற்றில், வேறு எந்த ஒரு நிறுவனத்தையும் விட கெய்ரோவில் அமைந்துள்ள அல்-அஸ்ஹர் பல்கலைக்கழகம் முக்கியப் பங்காற்றியுள்ளது. இது உலகில் தொடர்ந்து செயல்பட்டு வரும் மிகப் பழமையான பல்கலைக்கழகமாகக் கருதப்படுகிறது; கி.பி. 970 – 971 ஆம் ஆண்டுகளில் நிறுவப்பட்ட இது, இன்று 107 நாடுகளைச் சேர்ந்த சுமார் ஐந்து இலட்சம் மாணவர்களைப் பயிற்றுவிக்கிறது.

பதினொன்று நூற்றாண்டுகளாக அரபு மொழியை முன்னிறுத்திய முதன்மையான நிறுவனமாக அல்-அஸ்ஹர் ஆற்றியப் பங்கை இக்கட்டுரை ஆராய்கிறது. பாத்திமியர் காலத் தொடக்கத்திலிருந்து மம்லூக் பொற்காலம், ஒட்டோமான் காலம், நவீன நிறுவன மாற்றம் வரையிலான அல்-அஸ்ஹரில் அரபு மொழிக் கல்வியின் வரலாற்று வளர்ச்சியை இது எடுத்துரைக்கிறது; கற்பிக்கப்படும் அரபு மொழித்துறைகளைப் பகுப்பாய்வுச் செய்கிறது; உலகளாவிய மொழி வளர்ச்சிக்கான நடைமுறைகளைப் பதிவுச் செய்கிறது; மேலும் இன்றைய காலகட்டத்தில் அரபு மொழி நிறுவனமாக அல்-அஸ்ஹரின் நிலையும் முக்கியத்துவமும் மதிப்பிடப்படுகிறது.

முக்கியச் சொற்கள் :

அல்-அஸ்ஹர் பல்கலைக்கழகம், அரபு மொழி வளர்ச்சி, இஸ்லாமியக் கல்வி, அரபு மொழியியல், அல்பலாகா, பாத்திமியர், மம்லூக், ஒட்டோமான், அரபு மொழிப் பீடம், சர்வதேச மாணவர்கள்.

I. அறிமுகம்: அரபு மொழி, அல்-அஸ்ஹர் மற்றும் நாகரிக நினைவகம் :

மனித வரலாற்றில் ஒரு தனி நிறுவனம் அரபு மொழியை அல்-அஸ்ஹர் அளவிற்கு முறையாகப் பாதுகாத்தும் வளர்த்தும் வந்ததில்லை. இதற்கான ஆதாரமாகக் கூறப்படுவது என்னவெனில், ஆயிரம் ஆண்டுகளுக்கும் மேலாக அல்-அஸ்ஹர் அரபு மொழியைத் தனது ஒரே கற்பித்தல் மொழியாகப் பயன்படுத்தி வருகிறது; குறைந்தது பத்து நூற்றாண்டுகளாக உலக முஸ்லிம் சமூகத்தின் அனைத்துப் பகுதிகளிலிருந்தும் வந்த மாணவர்களுக்கு அரபு மொழியியல், அலங்காரவியல் மற்றும் இலக்கிய அறிவியல்களைக் கற்பித்து வருகிறது; 500 ஆண்டுகளுக்கும் மேலாக சர்வதேச மாணவர்களுக்கு தனது சொந்த செலவில் இடமளித்து வருகிறது; மேலும் செம்மையான அரபு மொழியில் புலமைப் பெற்றும் அதன் பாரம்பரியத் துறைகளில் பயிற்சி பெற்றும் வெளியேறும் அதன் பட்டதாரிகள் ஆப்பிரிக்கா, ஆசியா, ஐரோப்பா, அமெரிக்கா மற்றும் ஆஸ்திரேலியா முழுவதும் அந்த மொழியை எடுத்துச் செல்கின்றனர்.

அல்-அஸ்ஹர் கற்பிக்கும் பிற பாடங்களுக்கான ஓர் ஊடகம் மட்டுமல்ல அரபு மொழி; இஸ்லாமிய இறையியல் மற்றும் இஸ்லாமியச் சட்டவியல் ஆகியவற்றுடன் இணைந்து, பல்கலைக்கழகத்தின் அடையாளத்தை உருவாக்கும் மூன்று அடிப்படைத் துறைகளில் ஒன்றாகவும் அது விளங்குகிறது. இருபதாம் நூற்றாண்டின் தொடக்கத்தில் வெளியிடப்பட்ட நவீனமயமாக்கல் ஆணைகளின் மூலம் அல்-அஸ்ஹர் வரையறுக்கப்பட்ட பீடங்களைக் கொண்ட பல்கலைக்கழகமாக முறையாக அமைக்கப்பட்டபோது, நிறுவப்பட்ட மூன்று தொடக்கப் பீடங்களில் அரபு மொழிப் பீடமும் ஒன்றாக இருந்தது.

நிறுவப்பட்டது	கி.பி. 970–971 (ஹிஜ்ரி 359), கெய்ரோ, எகிப்து — பாத்திமிய கலீஃபா அல்-முஇஸ் லிதீனில்லாஹ்வின் ஆணைப்படி ஜவ்ஹர் அஸ்-ஸிகில்லி அடிக்கல் நாட்டினார்.
தொடர்ந்து செயல்படும் மிகப் பழமையான பல்கலைக்கழகம்	அல்-ஸைதூனா மற்றும் அல்-கரவிய்யீன் ஆகியவற்றிற்குப் பின்னர் நிறுவப்பட்ட மூன்றாவது பழைமையானது; ஆனால் அனைத்து நூற்றாண்டுகளிலும் இடையறாது செயல்பட்டு வந்ததாகக் குறிப்பிடப்படுகிறது.
கற்பித்தல் மொழி	அரபு — பதினொன்று நூற்றாண்டுகளாக தொடர்ந்து ஒரே கற்பித்தல் மொழியாகப் பயன்படுத்தப்படுகிறது.
அரபு மொழிப் பீடம்	கி.பி. 1930 — நவீன பல்கலைக்கழகத்தின் மூன்று தொடக்கப் பீடங்களில் ஒன்று.
சர்வதேச மாணவர்கள்	107 நாடுகளைச் சேர்ந்த மாணவர்கள்; 500 ஆண்டுகளுக்கும் மேலாக அல்-அஸ்ஹரின் சொந்த செலவில் மாணவர்கள் வரவேற்கப்பட்டுள்ளனர்.
மொத்த மாணவர் எண்ணிக்கை	சுமார் 5,00,000 மாணவர்கள் (ஆண் மற்றும் பெண்); 15,155 கல்விப் பணியாளர்கள்; 13,074 நிர்வாகப் பணியாளர்கள்
உலகளாவிய பணிகள்	ஆப்பிரிக்கா, ஐரோப்பா, அமெரிக்காக்கள், ஆசியா மற்றும் ஆஸ்திரேலியாவிற்கான பண்பாட்டு மற்றும் கல்வித் தூதுக்குழுக்கள்.

II. பள்ளிவாசலில் இருந்து மொழிக் கல்வி நிலையமாக: பாத்திமியர் காலம் :

2.1 நிறுவலும் முதல் கற்பித்தல் வட்டமும் :

ஹிஜ்ரி 359 (கி.பி. 970–971) ரமலான் 14ஆம் நாளில், பாத்திமியப் படைத்தளபதி ஜவ்ஹர் அஸ்-ஸிகில்லி, அல்-அஸ்ஹர் எனப் பெயரிடப்பட்ட பள்ளிவாசலுக்கு அடிக்கல் நாட்டினார். ‘அல்-அஸ்ஹர்’ என்பது ‘ஒளிமிகுந்தது’ என்ற பொருளைக் கொண்டது; பாத்திமிய வம்சம் தமது வம்சாவளியைச் சேர்ந்ததாகக் கூறிய ஃபாத்திமா அஸ்-ஸஹ்ராவை நினைவுகூரும் வகையில், மலர்தல்/ஒளிர்தல் என்ற பொருளுடைய z-h-r என்ற அரபு வேர்ச் சொல்லிலிருந்து இப்பெயர் பெறப்பட்டதாகக் கூறப்படுகிறது. ஹிஜ்ரி 361 ரமலான் 5ஆம் நாளில் பள்ளிவாசல் தொழுகைக்காகத் திறக்கப்பட்டது.

ஒரு தலைமுறைக்குள், ஹிஜ்ரி 378ஆம் ஆண்டில் கலீஃபா அல்-அஸீஸிடம் முறையான கல்வி வட்டங்களை நிறுவுமாறு ஆலோசனை வழங்கிய அமைச்சர் யஅகூப் இப்னு கில்லிஸ் மேற்கொண்ட முயற்சியால், அந்தப் பள்ளிவாசல் தொழுகை நடைபெறும் இடத்திலிருந்து கல்வி நிறுவனமாகத் தீர்மானகரமான மாற்றத்தை அடைந்தது. முதல் நாளிலிருந்தே ஒவ்வொரு பாடமும் அரபு மொழியிலேயே கற்பிக்கப்பட்டது.

முதல் முறையான கல்வி வட்டம் (ஹலகா) ஹிஜ்ரி 365 (கி.பி. 975) இல் தலைமை நீதிபதி அபூல்-ஹஸன் இப்னு அந்நுஅமான் அல்-மக்ரிபியால் நடத்தப்பட்டது. ஆசிரியர் தனது தூணருகே அமர, மாணவர்கள் அவரைச் சுற்றி அமர்ந்து, உரையாடல், விவாதம் மற்றும் வாய்மொழிச் சான்றளிப்பு ஆகியவற்றின் மூலம் அறிவுப் பேசப்படும் அரபு மொழியில் பரிமாறப்பட்டது.

2.2 வாய்மொழித் தேர்வும் அரபு மொழிப் புலமைக்கான சான்றளிப்பும் :

அல்-அஸ்ஹரில் தகுதி பெறும் முறைமையே அரபு மொழியின் துல்லியத்தைப் பயிற்றுவிக்கும் ஒரு செயல்முறையாக இருந்தது. கற்பித்தல் உரிமம் (இஜாஸா) பெற விரும்பியவர் பதினொரு துறைகளில் ஆறு மூத்த அறிஞர்களைக் கொண்ட குழுவால் வாய்மொழியாகத் தேர்வுச் செய்யப்பட்டார்; அந்தக் குழுவுக்கு அல்-அஸ்ஹரின் ஷெய்க் தலைமை வகித்தார். கால வரம்பு எதுவும் இல்லை; அரபு மொழிப் பேச்சின் மூலம் முழுமையான புலமை நிரூபிக்கப்படும் வரை தேர்வுத் தொடர்ந்தது.

வெற்றிப் பெறுவதற்கு பாடப்பொருளைப் பற்றிய அறிவு மட்டும் போதவில்லை; முறையான, துல்லியமான, அலங்கார நயமிக்க அரபு மொழியில் அந்த அறிவைத் தெளிவாக வெளிப்படுத்தும் திறனும் அவசியமாக இருந்தது. எனவே அல்-அஸ்ஹரின் தேர்வுகள் ஒரே நேரத்தில் கல்விப் புலமையையும் அரபு மொழியையும் சோதிக்கும் தேர்வுகளாக அமைந்தன.

III. அரபு மொழித் துறைகள்: அல்-அஸ்ஹர் கற்பிப்பது என்ன ?

அல்-அஸ்ஹரின் பாரம்பரியப் பாடத்திட்டம் அரபு மொழியின் பல்வேறு பரிமாணங்களைப் பிரதிபலிக்கும் விரிவான மொழியியல் அறிவியல் தொகுப்பைக் கொண்டிருந்தது. இவை துணைப் பாடங்கள் அல்ல; அல்-அஸ்ஹரின் அடையாளத்தின் மையப் பகுதிகளாக இருந்தன. அவற்றில் புலமைப் பெறாமல் எந்த மாணவரும் அல்-அஸ்ஹர் அறிஞர் என்ற நிலையை உரிமையுடன் கூற முடியாது.

இலக்கணம் - நஹ்வ் (نحو)

உருபியல் - ஸர்ஃப் (صرف)

சொல்லகராதியியல் - லுகா (لغة)

யாப்பியல் / செய்யுள் அளவு - அரூத் (عروض)

பொருளியல் / அலங்காரவியல் - மஆனி (معاني) 

உருவக வெளிப்பாடு - பயான் (بيان) 

இலக்கிய அலங்காரம் - பதீஉ (بديع) 

எதுகை/இறுதி ஒலி அறிவியல் - கவாஃபி (قوافي) 

3.1 இலக்கணம், உருபியல் மற்றும் செம்மொழி வாசிப்பிற்கான வாயில் :

நஹ்வ் (இலக்கணம்) மற்றும் ஸர்ஃப் (உருபியல்) ஆகியவை அரபு மொழி எழுத்தறிவின் தவிர்க்க முடியாத அடித்தளமாக அமைந்தன. இவை இல்லாமல் எந்த மாணவராலும் செம்மொழி அரபு நூலை வாசிக்கவோ, திருக்குர்ஆனை அதன் இலக்கண ஆழத்துடன் புரிந்துகொள்ளவோ, சட்டவியல் நூலின் தர்க்க அமைப்பைப் பின்பற்றவோ முடியாது. அல்-அஸ்ஹரில் இத்துறைகள் ஆழமான பகுப்பாய்வு முறையில் கற்பிக்கப்பட்டன: விதிகளை மட்டும் அறிந்திருப்பது போதாது; அவற்றின் பின்னுள்ள கோட்பாடுகளைப் புரிந்துகொண்டு, கடினமான நூல்களின் விளக்கத்தில் அவற்றைத் துல்லியமாகப் பயன்படுத்த வேண்டும் என மாணவர்கள் பயிற்றுவிக்கப்பட்டனர். மேற்கு ஆப்பிரிக்கா, தென் மற்றும் தென்கிழக்கு ஆசியா, காகசஸ், மத்திய ஆசியா போன்ற அரபு மொழி பேசாத பகுதிகளிலிருந்து வந்த மாணவர்களுக்கு நஹ்வ் மற்றும் ஸர்ஃப் கற்பித்தல் அரபு மொழி எழுத்தறிவிற்கான வாயிலாக இருந்தது.

3.2 அலங்காரவியல்: இல்முல் பலாகா

மூன்று அலங்காரவியல் அறிவியல்களான அல்-மஆனி (பொருளியல்), அல்-பயான் (உருவக வெளிப்பாடு), அல்-பதீஉ (இலக்கிய அலங்காரம்) ஆகியவை ‘இல்முல் பலாகா’ எனப்படும் சொல்வன்மை அறிவியலை உருவாக்கின. அல்-அஸ்ஹரில் அரபு மொழிக் கல்வியின் உயர்ந்த துறையாக இது கருதப்பட்டது. திருக்குர்ஆனின் ஒப்புயர்வற்ற இலக்கியத் தன்மை (இஃஜாஸுல் குர்ஆன்) பற்றிய ஆய்வுடன் இத்துறைகள் நெருக்கமாக இணைந்திருந்தன. திருக்குர்ஆன் என்ன கூறுகிறது என்பதோடு மட்டுமல்லாமல், எவ்வாறு, ஏன் அது அத்தகைய அபாரமான ஆற்றலுடன் கூறுகிறது என்பதையும் அறிஞர்கள் பகுப்பாய்வு செய்ய இவை பயிற்சி அளித்தன. அல்-மஆனி சொற்களின் வரிசை மற்றும் தொடரியல் வலியுறுத்தலின் பொருளியல் பகுப்பாய்வைக் கற்றுக் கொடுத்தது; அல்-பயான் உருவகம் மற்றும் காட்சிப்படுத்தலைப் பகுப்பாய்வு செய்வதற்கான கருவிகளை வழங்கியது; அல்-பதீஉ எதிர்மறை அமைப்பு, சொல் விளையாட்டு மற்றும் இணை அமைப்பு போன்றவற்றை அடையாளம் காணப் பயிற்சி அளித்தது. பலாகாவில் பயிற்சி பெற்ற அல்-அஸ்ஹர் அறிஞர் அரபு மொழியை வெறும் விதிகளின் தொகுப்பாக அல்லாமல், அசாதாரண அழகியல் மற்றும் தொடர்பாற்றல் கொண்ட உயிருள்ள மொழியாகக் கற்பித்தார்.

IV. நூற்றாண்டுகள் முழுவதும் அரபு மொழியின் பாதுகாவலராக அல்-அஸ்ஹர் :

4.1 மம்லூக் பொற்காலம் :

மம்லூக் காலம் (கி.பி. 1250–1517) அல்-அஸ்ஹருக்கும் அரபு அறிவுப் பாரம்பரியத்திற்கும் பொற்காலமாக இருந்தது. கி.பி. 1258 இல் மங்கோலியர்கள் பக்தாத்தை அழித்ததைத் தொடர்ந்து, அப்பாஸிய கலீஃபகமும் அதன் அறிவியல் கட்டமைப்பும் சிதைந்தன. இதனால் கெய்ரோவும் அல்-அஸ்ஹரும் இஸ்லாமிய அறிவுசார் வாழ்வின் ஒப்பற்ற மையமாக மாறின. பெரிய அறிஞர்கள் இங்கு வந்தனர்; கிழக்கிலிருந்து கையெழுத்துப் பிரதிகள் கொண்டுவரப்பட்டன; அல்-அஸ்ஹரின் நூலகம் உலகின் மிகப்பெரிய அரபு கையெழுத்துப் பிரதிப் பாரம்பரியக் களஞ்சியங்களில் ஒன்றாக வளர்ந்தது. மம்லூக் சுல்தான்களும் பிராந்திய அடிப்படையில் மாணவர்களுக்காக குடியிருப்பு மண்டபங்களை (அர்விகா) நிறுவினர். இவை உலகின் ஆரம்பகால பல்கலைக்கழக விடுதிகளாகவும், உலகளாவிய அரபு மொழி கற்றலின் வளர்ப்பிடங்களாகவும் அமைந்தன. பல்வேறு மொழிப் பின்னணிகளைச் சேர்ந்த மாணவர்கள் ஒரே பகிரப்பட்ட மொழியான அரபு மொழியுடன் ஒன்றாக வாழ்ந்தனர்.

4.2 ஒட்டோமான் காலம்: பண்பாட்டு அடையாளமாக அரபு மொழி :

ஒட்டோமான் ஆட்சிக்காலத்தில் (கி.பி. 1517–1798) துருக்கிய மொழி நிர்வாகம் மற்றும் அரசியல் அதிகாரத்தின் மொழியாக இருந்தது. மூன்று நூற்றாண்டுகளாக நீடித்த ஒட்டோமான் நிர்வாகத்தின் போது எகிப்தின் அரபு பண்பாட்டு அடையாளத்தைப் பாதுகாத்தது அல்-அஸ்ஹரே ஆகும். கற்பித்தல், அறிவாராய்ச்சி மற்றும் சமயச் செயல்பாடுகள் அனைத்தும் அரபு மொழியில் நடைபெற்றன. இதன் மூலம் துருக்கிய மொழிப் பேசும் அரசியல் அமைப்பின் கீழ் எகிப்து இருந்தபோதிலும், அரபு அறிவுப் பாரம்பரியத்தின் தீபம் அல்-அஸ்ஹரின் மண்டபங்களில் தொடர்ந்து எரிந்தது. அரபு பண்பாட்டுடன் அல்-அஸ்ஹர் கொண்டிருந்த ஆழமான தொடர்பு அரசியல் அதிகாரத்தால் இடம்பெயர்க்க முடியாததாக இருந்தது; திருக்குர்ஆனின் மொழியும் ஆயிரம் ஆண்டுகால அறிவுப் பாரம்பரியத்தின் மொழியும் ஆட்சியின் மொழியைவிட வலிமையானதாக நிரூபித்தன.

4.3 நவீன நிறுவனமயமாக்கல் :

1930ஆம் ஆண்டின் சட்ட எண் 49, அல்-அஸ்ஹரின் மூன்று தொடக்கப் பீடங்களில் ஒன்றாக அரபு மொழிப் பீடத்தை நிறுவியது. இதன் மூலம் அரபு மொழி இஸ்லாமியக் கல்விக்கான ஒரு கருவி மட்டுமல்ல; அதனுடன் சமநிலையுடைய ஒரு தனிப் பாடத்துறையும் ஆகும் என்ற கொள்கை வெளிப்படுத்தப்பட்டது. 1961ஆம் ஆண்டின் வளர்ச்சிச் சட்டம் மருத்துவம், பொறியியல் மற்றும் வணிகம் போன்ற புதிதாக நிறுவப்பட்ட நடைமுறை அறிவியல் பீடங்களையும் உள்ளடக்கிய அனைத்துப் பீடங்களிலும் அரபு மொழியைக் கட்டாயக் கூறாக மாற்றியது. இதன் மூலம் அல்-அஸ்ஹர் மருத்துவம் அல்லது பொறியியல் படிக்கும் மாணவரும் பிற பல்கலைக்கழகப் பட்டதாரிகளிடமிருந்து எதிர்பார்க்கப்படாத அளவிலான அரபு மொழித் திறனைப் பெற்றார். அரபு மொழி வெறும் செம்மொழி நூல்களின் மொழி அல்ல; முழுமையான அறிவியல் மற்றும் கல்வியின் உயிருள்ள மொழி என்ற நிறுவனத்தின் நம்பிக்கையின் நேரடி வெளிப்பாடாக இது அமைந்தது.

V. உலகளாவிய அரபு மொழி வளர்ச்சிக்கான நடைமுறைகள் :

5.1 ஐநூறு ஆண்டுகால அரபு மொழி மூழ்கிக் கற்றல் :

உலகளவில் அரபு மொழியை வளர்த்தெடுப்பதில் அல்-அஸ்ஹரின் மிகச் சக்திவாய்ந்த நடைமுறை அதன் சர்வதேச மாணவர் திட்டமாகும். முஸ்லிம் உலகின் பல பகுதிகளிலிருந்து வரும் மாணவர்களைப் பல்கலைக்கழகத்தின் சொந்த செலவில் தொடர்ந்து ஐநூறு ஆண்டுகளுக்கும் மேலாக வரவேற்று வருகிறது. தற்போது 107 நாடுகளைச் சேர்ந்த மாணவர்கள் அல்-அஸ்ஹரில் பயில்கின்றனர்; இத்தகைய தேசியப் பன்முகத்தன்மையை உலகின் வேறு எந்தக் கல்வி நிறுவனமும் ஒப்பிடத்தக்க அளவில் கொண்டிருப்பதாகக் கூற முடியாது. ஹவுசா, சுவாஹிலி, உருது, மலாய், வங்காளம், துருக்கியம், பாரசீகம், பிரெஞ்சு, இந்தோனேசியம் போன்ற மொழிகளைப் பேசிக்கொண்டு வரும் மாணவர்கள், செம்மொழி அரபு மொழியைப் பேசவும், வாசிக்கவும், எழுதவும் கூடிய திறனுடன் வெளியேறுகின்றனர். மேலும் அந்த மொழியிலேயே கற்பிக்கவும், தொழுகைகளை வழிநடத்தவும், பிரசங்கங்கள் வழங்கவும், அறிவார்ந்த ஆய்வுகளை உருவாக்கவும் தேவையான புலமையையும் பெறுகின்றனர். ஐந்து நூற்றாண்டுகளுக்கும் மேலாகத் தொடர்ந்த இத்திட்டத்தின் ஒட்டுமொத்த விளைவு, அல்-அஸ்ஹர் பாரம்பரியத்தை அடிப்படையாகக் கொண்ட அரபு எழுத்தறிவை உலகளவில் அசாதாரண அளவில் பரப்பியதாகும்.

5.2 சர்வதேச பண்பாட்டுத் தூதுக்குழுக்கள், வெளியீடுகள் மற்றும் ஃபத்வா மரபு :

அல்-அஸ்ஹர் ஆப்பிரிக்கா, ஐரோப்பா, அமெரிக்காக்கள், ஆசியா மற்றும் ஆஸ்திரேலியா போன்ற பகுதிகளுக்கு அறிஞர்கள் மற்றும் ஆசிரியர்களைக் கொண்ட தூதுக்குழுக்களை அனுப்புகிறது. அங்கு அவர்கள் அரபு மொழியையும் இஸ்லாமியக் கல்வியையும் கற்பிக்கின்றனர். ஐரோப்பா மற்றும் வட அமெரிக்காவில் உள்ள பல முஸ்லிம் சிறுபான்மை சமூகங்களில், அல்-அஸ்ஹர் பயிற்சி பெற்ற அறிஞர்கள் கிடைக்கக்கூடிய முக்கியமான அரபு மொழி ஆசிரியர்களாக உள்ளனர். அல்-அஸ்ஹரின் அறிவார்ந்த வெளியீடுகளான ஃபத்வாக்கள், ஆய்விதழ்கள் மற்றும் கல்விப் பாடத்திட்டங்கள் அரபு மொழியில் தயாரிக்கப்பட்டு உலகெங்கும் உள்ள முஸ்லிம் சமூகங்களை சென்றடைகின்றன. 1930 முதல் வெளியிடப்படும் ‘மஜல்லத்துல் அஸ்ஹர்’ உலகில் நீண்டகாலமாகத் தொடர்ந்து வெளிவரும் அரபு மொழி அறிவியல் ஆய்விதழ்களில் ஒன்றாகும். அதிகாரப்பூர்வமான இஸ்லாமிய அறிவின் மொழியாக அரபு மொழியைத் தொடர்ந்து நிலைநிறுத்துவதன் மூலம், உலக முஸ்லிம் சமூகங்களுக்கு அரபு மொழியின் மதிப்பையும் நடைமுறைத் தேவையையும் அல்-அஸ்ஹர் உறுதிசெய்கிறது.

VI. போட்டிநிலை மற்றும் சமகால முக்கியத்துவம் :

அரபு மொழியைக் கற்க விரும்பும் மாணவர்களுக்காக அல்-அஸ்ஹர் போட்டியிடுவதில்லை; வேறு எந்த நிறுவனத்திற்கும் இல்லாத நிறுவன அதிகாரமும் அறிவுப் பாரம்பரியமும் அவர்களை அல்-அஸ்ஹரை நோக்கி ஈர்க்கின்றன. அல்-அஸ்ஹரின் அரபு மொழிப் பீடம் இளநிலை முதல் முனைவர் பட்டம் வரை பாடத்திட்டங்களை வழங்குகிறது. இலக்கணம், அலங்காரவியல், சொல்லகராதியியல், இலக்கியம் மற்றும் மொழியியல் ஆகிய துறைகளில் நிபுணர்களை உருவாக்குகிறது. இவர்களின் பட்டதாரிகளுக்கு உலகெங்கும் அரசுகள், பல்கலைக்கழகங்கள், பள்ளிகள் மற்றும் இஸ்லாமிய மையங்களில் தேவை உள்ளது. அல்-அஸ்ஹரின் அரபு மொழிப் பட்டதாரிகளுக்கான தேவை தொடர்ந்து வழங்கலை விட அதிகமாக இருப்பதாக இக்கட்டுரை குறிப்பிடுகிறது.

அரபு மொழிக் கற்பித்தலை இஸ்லாமிய அறிவியலுடன் ஒருங்கிணைப்பது அல்-அஸ்ஹரின் போட்டிநிலையை மேலும் வலுப்படுத்துகிறது. முஸ்லிம் கற்றலாளர்களுக்கு — அரபு மொழிக் கல்வியின் மிகப்பெரிய பயனாளிக் குழுவுக்கு — அல்-அஸ்ஹர், மதச்சார்பற்ற எந்தப் பாடத்திட்டத்திலும் கிடைக்காத மொழித் திறனையும் சமய அதிகாரத்தையும் இணைத்து வழங்குகிறது: திருக்குர்ஆனை வெறும் சரளமாக வாசிப்பதல்லாமல், அறிவார்ந்த புரிதலுடன் வாசிக்கும் திறனை வழங்குகிறது. ஆயிரம் ஆண்டுகளாக இதுவே அல்-அஸ்ஹரின் தனித்துவமான மதிப்பாக உள்ளது.

“அல்-அஸ்ஹர் தேடப்படுகின்றது; அது தேடுவதில்லை. முஸ்லிம்கள் வாழும் ஒவ்வொரு நாட்டிலும், அரபு மொழி கற்பிக்கப்படும் ஒவ்வொரு இடத்திலும் அதன் பட்டதாரிகளுக்குத் தேவை உள்ளது. அரபு மொழிக்கும் இஸ்லாமிய அறிவுப் பாரம்பரியத்திற்கும் பதினொன்று நூற்றாண்டுகளாகத் தொடர்ந்து வழங்கிய சேவையின் மூலம் சேர்க்கப்பட்ட நம்பகத்தன்மையே இதற்குக் காரணம்.” — அல்-அஸ்ஹர் பல்கலைக்கழகத்தின் நிறுவனப் பதிவு.

VII. முடிவுரை: ஒரு மொழி, ஒரு நிறுவனம், ஒரு நாகரிகம் :

பதினொன்று நூற்றாண்டுகளாக அல்-அஸ்ஹர் பல்கலைக்கழகமும் அரபு மொழியும் பிரிக்க முடியாத இணைத் துணைகளாக இருந்து வருகின்றன. தனது அறிவாராய்ச்சி, பாடத்திட்டம், சர்வதேசத் திட்டம், பண்பாட்டுத் தூதுக்குழுக்கள் மற்றும் வெளியீடுகள் ஆகியவற்றின் மூலம் நிறுவனம் அரபு மொழியைக் கற்பித்தும், வளர்த்தும், பரப்பியும், தன்னுள் வெளிப்படுத்தியும் வந்துள்ளது. அரபு மொழியின் பாதுகாப்புக்கும் உலகளாவிய பரவலுக்கும் வேறு எந்த நிறுவனமும் அல்-அஸ்ஹரை விட அதிகமாகப் பங்களித்ததில்லை என்று இக்கட்டுரை வலியுறுத்துகிறது. அரபு மொழி திருக்குர்ஆனின் மொழி; இஸ்லாமிய நாகரிகத்தின் பிணைப்பு; உலகின் பல்வேறு மொழி மற்றும் பண்பாட்டு எல்லைகளைக் கடந்து உலகளாவிய முஸ்லிம் சமூகத்தைத் தொடர்புபடுத்தும் ஊடகம். அதற்கு மிகப்பெரிய நிறுவனப் பாதுகாவலராக அல்-அஸ்ஹர் விளங்குகிறது.

இருபத்தொன்றாம் நூற்றாண்டில் உலக முஸ்லிம் மக்கள்தொகை 1.8 பில்லியனைத் தாண்டியுள்ள நிலையில், அரபு மொழி எழுத்தறிவுக்கான தேவை இதுவரை இல்லாத அளவிற்கு அதிகரித்துள்ளது. இந்த நிலையில் அல்-அஸ்ஹரின் பணி முன்பைவிடவும் அவசரமானதாக உள்ளது. 107 நாடுகளைச் சேர்ந்த அதன் மாணவர் சமூகம், ஐந்து நூற்றாண்டுகளாக சர்வதேச அறிஞர்களை வரவேற்ற பாரம்பரியம், அரபு மொழிப் பீடம் மற்றும் உலகளாவிய பண்பாட்டுத் தூதுக்குழு வலையமைப்பு ஆகியவை அந்தத் தேவையை நிறைவேற்றுவதற்கான தனித்துவமான நிலையை அல்-அஸ்ஹருக்கு வழங்குகின்றன. அல்-அஸ்ஹரின் அரபு மொழிப் பணியைப் புரிந்துகொள்வது என்பது மனித நாகரிக வரலாற்றில் ஒரு நிறுவனத்திற்கும் ஒரு மொழிக்கும் இடையிலான குறிப்பிடத்தக்க இணைப்புகளில் ஒன்றைப் புரிந்துகொள்வதாகும்.

மேற்கோள்கள் / References :

• Berkey, J. P. (2001). Popular preaching and religious authority in the medieval Islamic Near East. University of Washington Press.
• Dodge, B. (1961). Al-Azhar: A millennium of Muslim learning. Middle East Institute.
• Eccel, A. C. (1984). Egypt, Islam and social change: Al-Azhar in conflict and accommodation. Klaus Schwarz Verlag.
• Heyworth-Dunne, J. (1938). An introduction to the history of education in modern Egypt. Luzac.
• Jami‘at al-Azhar al-Sharif. (n.d.). Jami‘at al-Azhar wa khidamatuha li-tarwij al-lughah al-‘Arabiyyah. Cairo: Al-Azhar University. [Original Arabic source]
• Makdisi, G. (1981). The rise of colleges: Institutions of learning in Islam and the West. Edinburgh University Press.
• Skovgaard-Petersen, J. (1997). Defining Islam for the Egyptian state: Muftis and fatwas of the Dar al-Ifta. Brill.
• Versteegh, K. (2014). The Arabic language (2nd ed.). Edinburgh University Press.
• Zaman, M. Q. (2002). The ulama in contemporary Islam: Custodians of change. Princeton University Press.